PRI NI

Dana Esperantista Junulara Organizo (DEJO) kaj ĝia amikaro ekde 2007 partoprenas en Roskilde Festivalo, unu el la plej grandaj muzikfestivaloj de norda Eŭropo. Ĝi estas organizata dank’ al kontribuo de entute 30 mil volontuloj, kiujn varbas diversaj ne-registaraj organizoj, kiel la nia. Nia rolo estas do trovi kaj prizorgi propran grupon de kelkdek volontuloj por deĵori por la festivalo, farante iun utilan taskon. Kontraŭ tio niaj deĵorantoj ricevas senpagan plenan bileton por la festivalo, kio alikaze kostus sufiĉe multe (ĉ. €320 ekde 2023). Nia asocio ricevas ankaŭ subvencion de la festivalo por kovri organizajn kostojn, kaj ni uzas la plejparton de tiu sumo por krei tre favorajn kondiĉojn por niaj karaj kunfestivalanoj. Ekzemple, ni konstruas grandan bazon en aparta loko fermita al la publiko kaj tie ni kuiras kaj manĝas kune.  Kutime ni aĉetas manĝon por ĉiuj dum la tuta festivalo. Per kroma mono ni subtenas esperantistojn en bezono (en la lastaj jaroj – personojn en malfacila vivsituacio pro la milito en Ukrainio) kaj ankaŭ Esperanto-eventojn.

Estas multaj taskoj kiujn eblas fari por la festivalo.  Dum la jaroj ni gvidis redonbudon, kontrolis brakbendojn ĉe pordegoj, patrolis ludparkon kaj havis etan manĝbudon.  Venontjare (2024) ni plej verŝajne denove servos kiel pordoservistoj.

La Pordego 19 plena de gajaj partoprenantoj dum la malfermo en 2016

Krom kontrolado ĉe la enirejoj ni devus preti respondi iujn ajn demandojn, kiujn la festivalanoj havas, pri direktoj aŭ festivalaj praktikaĵoj. Ni servas ankaŭ kiel la okuloj kaj oreloj de pli gravaj servoj de la festivalo, tio estas purigado, sekureco kaj medicina helpo. Ĝenerale, ni ne devas mem rekte agi pri tiuj aferoj, sed ni devas raporti pere de radio, kio okazas en nia posteno. Pro la uzado de radio, niaj teamoj ĉiam enhavas unu danparolanton. Sed interne en la grupo ni uzas tiel multe, kiel eble Esperanton.

Por plenumi ĉiujn niajn taskojn ni bezonas vian helpon. Ni invitas esperantistojn el la tuta mondo por senpage festi kun ni kaj realigi la revon. Tio signifas kelkajn (kuitme 3) deĵorojn, kroman helpon ekster tiuj horoj, sed ankaŭ senpagan aliron al grandega muzikfestivalo kun famegaj artistoj, senpagan loĝadon kaj altkvalitan manĝon dum la tuta semajno, kaj ĉefe unikan etoson en grupo de spertaj festemuloj.

Tio ĉi estas bonega ŝanco por amuziĝi, uzi kaj montri Esperanton al 100 000+ homoj dum unu tuta semajno!